Estudo «Como comemos? Análise do consumo de alimentos e bebidas desde unha perspectiva nutricional (2022-2024)»

Galicia mantén unha dieta equilibrada, pero reduce o consumo de froita e peixe 

• O 76 % da dieta galega corresponde a alimentos saudables, por riba da media nacional  do 73,5 %.
• A comunidade conserva un padrón alimentario equilibrado, pero diminúe o consumo  de froitas, hortalizas e peixe respecto a 2022.
• Galicia destaca pola súa elevada presenza de legumes e un consumo de produtos  frescos superior á media. 

A Coruña, 13 de novembro de 2025.– Galicia mantense entre as comunidades cunha dieta  máis equilibrada, segundo o estudo «Como comemos? Análise do consumo de alimentos e  bebidas desde unha perspectiva nutricional», da Fundación EROSKI, que analiza o gasto e o  consumo de alimentos e bebidas desde unha perspectiva nutricional, a partir dos datos do  Panel de Consumo do Ministerio de Agricultura, Pesca e Alimentación (MAPA) entre 2022 e  2024. 

O informe mostra que ningunha comunidade autónoma acada os niveis ideais de consumo  nos catro grupos de alimentos de consumo recomendado nos que se centra especialmente  o estudo (froitas e hortalizas, legumes, froitos secos e peixe), aínda que Galicia presenta un  padrón alimentario equilibrado e por riba da media estatal. Na comunidade, os alimentos  de consumo recomendado diario e frecuente representan o 76 % do total, fronte ao 73,5 %  da media española. 

A pesar da súa boa posición, o estudo detecta signos de retroceso nalgúns grupos de  alimentos clave: unha lixeira caída no consumo de froitas e hortalizas e unha redución no  peixe, historicamente elevado na comunidade. Paralelamente, a carne gaña peso na dieta,  o que modifica o equilibrio tradicional da dieta atlántica galega, caracterizada por un maior  protagonismo do peixe en comparación coa carne. 
Ademais, o informe salienta un cambio nos hábitos de consumo de lácteos, xa que  descende no consumo de leites fermentados naturais mentres que aumenta no de  sobremesas lácteas azucradas ou edulcoradas, o que supón unha perda de calidade  nutricional neste grupo.

 Pola contra, as legumes manteñen unha presenza destacada na alimentación galega e  sitúanse por riba da media nacional e confirman o seu papel como un dos grupos con mellor  comportamento dentro da dieta rexional. 
 

Evolución do consumo e prezo medio

Entre os dous anos comparados, Galicia amosa unha lixeira tendencia descendente nos  grupos de alimentos de consumo recomendado diario (froitas e hortalizas), cunha redución  do 0,4 % no peso total destas categorías. As categorías de consumo máis recomendado no  seu conxunto (froitas e hortalizas, froitos secos, legumes e peixe) só diminuíron o seu  consumo nun 0,01 % en comparación con 2022. Por outra banda, as categorías de consumo  ocasional ou non recomendado (doces, aperitivos e bebidas alcohólicas) manteñen unha  participación estable arredor do 24 %, por debaixo da media nacional do 26,5 %. Estes datos  reflicten un padrón de consumo aínda equilibrado, aínda que con marxe de mellora para  recuperar os niveis de anos anteriores e manter a esencia da dieta atlántica. 
Respecto ao gasto, Galicia mantén unha composición estable no conxunto da súa cesta.  Entre 2022 e 2024, o gasto medio por persoa aumentou un 13 %, mentres que o volume total  de alimentos consumidos diminuíu un 2 %, unha tendencia similar á que se observou no  conxunto de España. O informe tamén mostra que o prezo medio por quilo dos produtos  saudables é inferior ao das categorías menos recomendadas, polo que mellorar a dieta non  implica un custo económico maior. 
«Galicia parte dunha base sólida na alimentación saudable, pero necesita reforzar o  consumo diario de froitas e hortalizas e recuperar o papel do peixe e dos lácteos naturais  na súa dieta tradicional. A educación alimentaria e o acceso a produtos frescos e de  proximidade seguirán sendo clave para avanzar cara a un padrón máis equilibrado», afirma  Alejandro Martínez, director da Fundación EROSKI. 
 

Acerca de FUNDACIÓN EROSKI

Fundación EROSKI es una iniciativa impulsada por EROSKI en 1997 con el objetivo de trasladar a la  sociedad múltiples iniciativas de acción social, principalmente relacionadas con la investigación,  innovación, promoción, educación y protección de las personas consumidoras y el medio ambiente,  velando por una alimentación y hábitos de vida saludables; fomentando así una sociedad más justa,  solidaria y cohesionada, siempre con el intercooperativismo como eje de su filosofía de actuación.