EROSKI FUNDAZIOAK BIKOIZTU EGIN DU ELIKADURA ETA OHITURA OSASUNGARRIEN HEZKUNTZA-PROGRAMAKO PARTE-HARTZAILEEN KOPURUA

• 512 ikastetxek eman dute izena programan, 2014-2015eko lehen hiruhilekoan baino %67 gehiagok
• Programaren barruan nekazaritzako elikagaien ekoizleei egindako bisitak sartzen dira, eta hiruhileko honetan 600 tailer inguru eskaini dira, iaz epe berean baino %20 gehiago
• Ikastaro honetan, ikus-entzunezko formatuan eskuragarri dauden materialak zabalduko dira, adingabeek errazago eskura ditzaten eta erakargarriagoak eta erabilgarriagoak izan daitezen

Elorrion, 2015eko abenduaren 28an.- 6 eta 12 urte bitarteko ia 40.000 ikaslek parte hartu dute Espainian EROSKI Fundazioaren Elikadura eta Bizi Ohitura Osasungarriei buruzko Hezkuntza Programan, ikasturteko lehen hiruhilekoan. Hala, iazko epe bereko parte-hartzaileen kopurua bikoiztu egin da. Ikasturte honen hasieratik, autonomia erkidego guztietako 512 ikastetxek eman dute izena programan, 2014-2015 ikasturteko lehen hiruhilekoan baino %67 gehiagok.

Edizio berri honek Lehen Hezkuntzako ikasle zein irakasleei eduki berriak, jarduera gehiago eta tailer praktikoak eskaintzen dizkie. Era berean, PEAHSek ikasturte honetan ikus-entzunezko formatuan eskuragarri dauden materialak zabaldu egingo ditu, hartara, adingabeak errazago sartu ahal izateko eta erakargarriagoa eta erabilgarriagoa izan dadin. Hainbat diziplinatako profesionalek osatutako batzorde zientifiko batek osatu du programa: medikuntza eta pediatria, nutrizioa eta dietetika, psikopedagogia eta pedagogia.

“EROSKI Fundaziotik, haurren obesitate-tasak gora egin duela ikusita, programa hau jarri genuen martxan 2012an, eskola-umeen artean elikadura eta bizi-ohitura osasungarriak sustatzeko. Urtez urte, programa hazi eta hobetu egiten da, dagoeneko eman duten irakasleek egindako balorazioei eta ekarpenei esker”, adierazi du Alejandro Martínez Berriochoak, EROSKI Fundazioko zuzendariak. 2014-2015 ikasturtean ia hirukoiztu egin zen parte-hartzaileen kopurua, eta Espainia osoko 900 ikastetxetako 70.000 ikaslek baino gehiagok eman zuten izena.

Eduki berriak Bihotzaren Espainiako Fundazioarekin batera

Eskola-gelako saio teorikoetan eta tailer praktikoetan oinarritutako formatuarekin, ikastetxeetako Hezkuntza Programak eduki berriak ditu edizio honetan, ikasleei elikadura osasungarriaren eta bizi-ohitura osasungarrien inguruko prestakuntza hobea emateko helburuarekin. Horrela, Bihotzaren Espainiako Fundazioarekin (FEC) lankidetzan garatutako saio berri bat sartzen da - ‘Jan eta zaindu zure bihotza’-. “Garrantzitsua iruditzen zaigu ikasleei txikitatik jakinaraztea gure osasunean zer eragin duen elikadura egokia izateak”, adierazi du Alejandro Martinez Berriochoak. Saioen edukia bideoan ere ikusgai izango da aurten.

Klase praktikoetan ikasleek saio teorikoetan ikasitakoa lantzen dute. Ikasturteko lehen hiruhileko honetan, programak 600 tailer inguru eskaini ditu, iazko aldi berean baino % 20 gehiago: “Ikasleek gure supermerkatu eta hipermerkatu batzuk bisitatzen dituzte, eta erosketak egiten dituzte menu osasungarri bat egiteko. Azken edizio itxian (2014-2015) 1.200 tailer baino gehiago egin ziren 180 establezimendutan”, adierazi du EROSKI Fundazioko zuzendariak.

ikastaroan, gainera, ‘Nire lurreko produktuak’ tailerra ere egingo da. Horri esker, haurrek bertatik bertara ezagutu ahal izango dute nekazaritzako elikagaien ekoizleen instalazioetan beren eskualdeko elikagaien jatorria, eta tokiko ekoizpenak duen garrantzia egiaztatu ahal izango dute. Nekazaritzako elikagaien ekoizleen tailer berri hau ikus-entzunezko formatuan dago eskuragarri hezkuntza-programaren edizio berrian http://energiaparacrecer.escueladealimentacion.es/es/los-productos-de-mi-tierra webgunean.

2015-2016 ikasturtean PEAHSen parte hartu nahi duten ikastetxeek www.escueladealimentacion.es edo 94 6072841 arretarako telefonoan eman dezakete izena.