EROSKI Elikadura Eskolak bere lehen jai handia ospatu du Gasteizen

EROSKI Elikadura Eskolak bere lehen jai handia ospatu du Gasteizen.

Karts-en barruan, arrapala puzgarrietan irristatzen edo saskiratzeak diana osasuntsu batean apuntatzen. Gasteizko eta inguruko herrietako lehen hezkuntzako dozenaka ikaslek ospatu zuten, azaroaren erdialdeko asteburu batean, EROSKI Fundazioaren Elikadura Eskolak Arabako hiriburuaren bihotzean antolatu zuen lehen jai handia. Ospakizunak Gasteizko Udalaren babesa izan zuen, Hiriburutza Gastronomikoaren programa ofizialaren barruan.

Jaiaren helburua zen Eroski Fundazioak elikadura eta bizi-ohitura osasungarriei buruz egiten duen heziketa-programaren edukia modu ludikoan hurbiltzea Lehen Hezkuntzako ikasleei eta Gasteizko familiei. Izan ere, ikusirik haurren obesitate-tasak igoera kezkagarria izan duela azken urteotan, EROSKI Elikadura Eskolak “joera hori geldiarazi nahi du, osasunarekin zerikusia duten hainbat elkarterekin eta Espainia osoko ikastetxeekin lankidetzan, zeinek programan parte har baitezakete eta garatutako eduki pedagogiko guztiak doan erabil baititzakete”, adierazi du Alejandro Martínez Berriochoak, EROSKI Fundazioko zuzendariak.

350 m2-ko karpa handi batean, Gasteizko ikasleek elikadura orekatuari eta bizi-ohitura osasungarriei buruz aurrez ikastetxean landutako ezagutzak praktikan jartzeko aukera izan zuten, eskala handiko jolasen, puzgarrien eta hainbat jardueraren bidez. Neurri naturalekoak dira, eta diseinu berriak dituzte. Jolasen bidez, gosari on baten garrantzia gerturatu zitzaien haurrei, elikagai-mota bakoitzerako gomendatutako kontsumo-maiztasuna, eta EROSKIk nutrizio-etiketa aurreratuan nutrizio-semaforoa identifikatzeko modua azaldu zitzaien, nutrizio-informazio gardenagoa izateko.

600 haurrek eta 1500 familiak baino gehiagok gozatu zuten bi egunetan zehar jolaserako proposamenaz. Festara iritsi zirenean, parte-hartzaileek jatetxeetako menuaren antzeko gutun bat jaso zuten, taldeka. Bere misioa: menu bat sortzea, non ez ziren falta izan bere lehen eta bigarren platerak, postre batez gain. Ginkana gisa, haurrek hainbat proba gainditu behar izan zituzten menu osasungarria osatzeko plater horiek lortzeko.

Hiru urte ohitura osasungarrietan hezten

EROSKI Elikadura Eskolak hirugarren edizioa egingo du aurten, gazteenen artean elikadura eta bizi-ohitura osasungarriak sustatzeko asmoz. Programak saio teorikoak eta tailer praktikoak uztartzen ditu. Espainia osoko 300 bat ikastetxetako 16.000 haurrek baino gehiagok hartu zuten parte prestakuntza-programa horren aurreko edizioan, eta medikuntzan, nutrizioan eta dietetikan, psikopedagogian eta pedagogian aditu diren zientzia-batzorde batek osatu zuen, Hezkuntza Ministerioaren jarraibideei jarraituz.